Стих о любви на лезгинском языке

загрузка...

Добавлять комментарии могут только зарегистрированные пользователи.
[ Регистрация | Вход ]

30.04.2012, 15:42

Джарият Магомедова - Стихотворения на Лезгинском языке

Дамахзава гьарда вичин макандал
Акъвазиз к1анзавач зазни гуьгъуьна,
Пуд Ст1алар алхишзавай Шагь дагъдал,
Фонарар хьиз гуьнейралла куьк1уьна. 

Ст1алрикай гзаф ава манияр,
Ст1алрин т1вар машгьурди я дуьньядиз
Пуд Ст1алар- пуд стих стха я, архаяр,
Сад галачиз тежедайбур ярамиш.
        
Сифте къвезва зи хайи хуьр, Винист1ал,
Къайи гьамга къарасуйрин чешме тир,
Гьейран жеда аватайла межлисрал
А жемятдал, хатур хуьниз чешне тир.
         
Кьуланст1ал, юкьва авай багъларин
Еришар ви лайихлу я тарифриз,
Ягъанва вун ви стхайрихъ, гьунаррин
Къелейрихъ хьиз, кутугнавай игитриз
        
Шииратдин Мекке Агъаст1алар
Гьар гатфарихъ ухшар жеда куьнуьдиз,
Алт1ушзавай вирт1ед пар гвай мугьманар,
Къимет гузвай ширин лезги манидиз.
        
Вуч гуьрчег я ст1ал сегьер чигедин
Рап-рапзавай нур чук1уриз ракъина,
Зи Ст1алар алмасар я Куьредин
Къагьриманрин тураравай женгина.
         
Дугунарни, паласарни Къазмаяр
Какахьнавай авадан я Ст1алар,
Сергьятсуз я океанар авахьай 
Пуд Ст1алрин Кпул ятар, булахар.

Яран Сувар 

Гьуьжетдава кьуьдни гатфар:
-Къуватдама мекьер, къаяр,
Ажугъ кумаз къвезвач ахвар,
Къурда живер, кьурда мурк1ар!

-Арадавай хатур гьуьрмет
Квадармир, кьуьд, мийир къелет,
Халкьар хьанва вакай икрагь,
К1амач аяз, зун я панагь.

Атанва вун гьеле зулуз,
Зур гваз, ганач бегьер вахчуз,
Мислятдалди вахце нубат,
Чандал хкин за т1ебиат.

Гьахьнавайбур к1аз хьиз къенез,
Чимивилихъ хьанва муьгьтеж,
Вахт я цадай картуф келем,
Гуда вуна зарар бегьем.

Килиг садра, мягьле-мягьле,
Адет яз чаз амай куьгьне,
К1анч1арикай кьакьан  пара
Чка-чка кьунва хара.

Жуьреба-жуьр т1уьнри дадлу
Къумбарнавай кефи яшлу,
Жегьил, гъвеч1и, ч1ехи вири
Калтугда вахъ, жемир пехъи.

Югъни-йифни сад хьай бере
Палдумар гваз жерге-жерге,
Гьараяр гуз «ахлад, ахлад»,
Кьада стха, кьуьд, ваз инад.

Бесрай, ксус жуван муьгьлет,
Ви зегьметдиз ганва къимет,
Мартни, апрель, май -зи варцар,
Яшамишрай Яран сувар!

                                                     Март 2012 йис

Дагъвийриз

Эй, намуслу дагъви эллер,
Девлет авай гьисаб тежер,
Къагьриманрин гвайбур турар,
Къекъверагриз хьанвай ухшар!

Гьам аранра, гьам дагълара,
Халкь сифте хьиз я бейчара.
Гьатнава мад сузадин ван,
Чир хъжезмач дустни душман.

Баябан я жанлу чилер,
Вахчун тийиз магьсул,бегьер,
Патан т1уьнри гузвач чаз дад,
Ша, чран фу сарубугъдад!
                   20.01.2012йис.

Зи Лезгистан

Зи Лезгистан, хайи макан!
Гуьрчег, гуьзел к1ани Ватан!
Агъзур сефер тикрарайт1ан,
Галат тежер гафар зи чан!                

Ахъагъайла газет, журнал,
Интернетдин сайтрин к1ват1ал,
Ви тарифдин и ц1арари
Ифирзава дамард иви.

Турбур Ватан вахтуналди,
Хушуналди, гужуналди
Къакъатайбур ерийривай
Тух жезвач ви манийрикай!

Лезги чилин накьвадин ц1ир,
Цуьк авурла чк1из атир, 
Экъеч1айт1ан къариблухда,
Рейгьан жезва ви къурухда.

Муьт1уьгъ я чун, диде Ватан,
Ви къуватдиз,  ийиз  гьейран,
Галч1урзавай мукьва-яргъа,
Ваз вафалу арха-стха.

Хуьре ава гурлу демер,
Жегьилар я жуьтер-жуьтер,
Вун жагъуриз къекъвез вилер
Вучиз тада тек, к1ани руш?

Жаваб тагуз зи зенгериз,
Дарман тийиз зи дердериз,
Кьилди килигиз гъетериз,
Вучиз тада тек, к1ани руш?

Эзберзава шумудра за.
Гьазурнавай гафар хура,
Яб акализ, хъуьрез вацра,
Вучиз тада тек, к1ани руш?

Куьруьбур я йифер гатуз,
Хъфида чун гьарнихъ зулуз,
Экъеч1 тийиз санал ч1уруз,
Вучиз тада тек, к1ани руш?

Зи дердеркай хьанва мани, 
Чуьнгуьр гваз зун къвезва къарши,
Ачухиз ваз гьиссер хци,
Вучиз тада тек, к1ани руш?

19.10.2011

Тухузвай вич ухшар тушиз
Масабуруз, т1авусдин къуш.
Гьикьван вахт я ахтармишиз,
За яргъалай, ажайиб руш.

Герек гафар мецел текъвез, 
Кьурадай ик1, жедани гуж,
К1ич1езва заз патав къекъвез,
Рахадат1а, ажайиб руш?

Шумудни сад к1анз зун яр кьаз,
Элкъвезва зал, я лугьуз хуш.
Гьик1 и жуьре суьгьуьрда таз,
Алакьнат1а, ажайиб руш?

Т1алабун я и дуьшуьшдиз,
Хиялари гузвайдан т1уш,
Тек са сефер ша гуьруьшдиз-
Сир ахъагъин, ажайиб руш.

Сузадаллаз тамир вуна,
Вакай фикир жезва аруш,
Хъфимир зун кьилди туна,
Жаваб гице, ажайиб руш!

Хъуьрезва ам, кьил галтадриз:
-Жедач, баде кьуьзуь я,
Лаш зи юлдаш, куьмекчи я-
Жендек михьиз гъуьргъуь я.

-Ак1 ят1а ша, акьванар тур,
Хт1ун гьак1ни айнаяр,
Ацукь, баде, ава захъ ваз
Гудай ихьтин суалар!

Гьинизна на и шикилда
Авай кифер, шумал юкь?
Акьахдан зун п1инид тарциз
Къужахай на назик к1ук1?

На лугьудай, ч1имч1ир хьиз вун
Элкъвез жедай ник1ерал,
Баде, завай Шалбуз к1ук1уш
Алцум жеда к1вачерал!

Вахчунат1ан гзаф зат1ар,
Рази жез вун кьисметдал,
Вуч багъишна ваз гъуцари?
Шад я хунча девлетдал?!

Хунча? Баде, къалура ман, 
Вуч ават1а килигин!
Туп1ал, зак1ал, япагьанар
Ша, вири захъ гилигин!

Кьилелай кап алтадзавай,
Бадедин ван къвезва заз:
-И дуьньяда виридалай
Багьад вун я, зи алмас.

Ни чирда                 
 «Квекай жезва, чан диде, фу?»--
Хабар кьазва аялди, 
«Гъуьрни къуьлни гьинай къвезва,
Гьина цазва, квел ва ни?»

Четин я заз жавабар гуз,
Суалри ат1узва рик1,
Агьалияр яз хуьрерин
Авамвилиз вучда, гьик1!

Карагзава вилерикай
Лепе гузвай къуьлуьн ник,
Бул магьсулрив ац1анвай рат,
Векьин к1унт1ар кьунвай тик.

Цанар цадай тракторар,
Мад машинар пара тир,
Чирдай къадир къуьлуьн тварцин
Ч1ехи бубад багьа тир.

«Баркаван фу чи суфрадик
Квачир вахт квез такурай», --
Лугьуз бадед атирлу "варз" 
Т1анурдай чав вугудай.

Т1урар гудай къелемлухра,
Ичин, шефтел, хутарин,
Еке ашкъи, гьевес аваз
Бегьер к1ват1дай багъларин.

Къимет амач къе лежбердиз,
Хуьзва халкьар базарри,
Нек1ер, ч1емер амач халис,
Гьелекзава азарри.

Жанлу ч1улав накьвар хайи
Шумуд йисар я хамдиз
Вуч чешне яз тада чна
Гележегдин аямдиз.

Туна хизан, к1вал, хуьрни ч1ал
Гъурбатда хуьз жедан кьил,
Ни чирда чи аялриз къуьл,
Гергер, сил, амай техил?

Январь 2011 г.


Вучиз аваз тарифардай яйлахар,
Чи малари гирнагъзава шегьредал,
Ават1ани гьуьлер, вац1ар, булахар,
Ятар гузва бустанриз гъиз ведредал?

Къадимдилай инихъ еке ад авай
Хатур – гьуьрмет гумач вучиз дагъвийрив,
Чахъ дуствилер лигимардай чад авай,
Жуьгьенрик ц1ай кумачни, гуз пип1инрив?

Уьмуьр тирла бахт инсандиз багъишай,
Къурбандар я, вучиз, чанар дявейрин,
Фагьум-фикир, веревирдер деринрай
Ийиз, квел вил ала, лагь, чи регьберрин?

Гъиляй-виляй вегьена дуьз тербия,
Югъ-йиф талгьуз герек бере зегьметар,
Рик1 гутуна къайгъу, чара тавуна,
Къвазда вучиз тийиз садни бейкефар?

Коррупция- т1егъуьн мердимазаррин,
Чи арайра хумаяр хьиз чук1уриз,
Гузни - къачуз хсуси сес инсандин,
Разивалда т1варар вучиз кьац1уриз?

Ргазва халкь цеквер тегьер мукара,
Т1унут1ралди хуьз жедани хзанар,
Бул бегьеррин аваз чилер йисара,
Вучиз артух я бейкаррин кьадарар?

Инанмишвал къе герек я пакадкъахъ 
Т1алдин себеб ашкара я заз жуван,
Регьят кар туш къалдин к1вале гьахъ-нагьахъ,
Субутариз, авачирла суд-дуван.
 
Дерин тавуй хирер залан азарди,
Вучиз фалчи-жерягьарихъ ягъазва,
Умуд ама, ама ватан ч1аларни,
Хуьн тавурт1а, геж жезвайди аквазва.        Декабрь 2010

Туьк1уьрна са шумуд шиир
Ракъурна за газетдиз
Акъатунал вил алай зун,
Акъвазнавай гуьзетиз.

Вахчуз хтай "Лезги газет"
Къекъвезвай лап тади кваз,
Аквадат1а лугьуз абур 
Чапна жуван т1вар алаз.

Къвез, алатиз, физ гьафтеяр,
Хквез хьана газетар,
Амма, анжах гьич садани 
Авачир зи «эсерар».

Фикирна за, белки жува
Гъана к1андат1а рик1ел?
Авуна зенг, авай нумра
Мерд Алидин завотдел.

Рик1и гуп-гуп ийизвай за 
Хабар кьуна явашдиз:-
Зи шиирар, Мерд Жалилов,
Мус акъудда газетдиз?

Шуьк1уь ванци гана жаваб:
-Вуж ят1а, лагь, гьинай я?
Гьинва шиир? Аквазвайбур
Ц1иргъедавай гафар я.

Зурзана гъил. Хкудна за
Тади гьалда телефон,
Япарамай Мерд Алидин
Туьнбуьгьзавай хци ван:

-Жуьрэтзава вучиз на руш
Шаирвилин рекьиз физ!
Рифма жагъай гафарин ц1иргъ
Ракъурмир чи газетдиз!

Алахъунар гьак1анбур я!
Авач талант, аквазва,
Инжиклу мад ийимир чун,
Шаирар чахъ авазва.

Амукьнач захъ лугьудай гаф,
Туьгьметрин сан яргъи я.
Машгьур жез к1анз авур къилет
Тикрар хъийиз регъуь я.

Кхьизва за акъваззавач,
Хиялрикай жезва ц1ар.
Ц1арарин ц1иргъ  яргъиди я,
Шиир? Нивай кьан хабар..

Къейд ийизва дидейрин югъ,
"Дидеяр хуьх!" - лугьузва.
Диде я зун, зи девирда
Дидейрин рик1 ат1узва.

Къурхулу я акъадариз,
Шарагар жуван мукай-
Акьребри хразва чилер,
Гьатна акъат тийидай.

Акван тийир душманари 
Къакъудзава балаяр,
Ясда аваз ч1улавбура,
Амукьзава архаяр.

Къени карда чан эцигай,
Гьар садан амукьда т1вар.
Жегьил чанар барбат1 жезва,
Алакь тавур са гьунар.

Кьегьалвилелд кьейит1а хва,
Дидедин кьил винева,
Гьак1 пуч жезвай жаванарин,
Гунагьар нин хивева?

Къейд ийизва дидейрин югъ,
-"Дидеяр хуьх!"- лугьузва...
                                    2. 11. 2010 г.

Шагьид хьана йикъара зун
Эхтилатдин хзандин,
Яшлу халу гьазур хьанвай
Туьквендиз физ райондин:

--Вуч хабар я, итим квез мад
Харж ийизва кепекар?
--Компьютер къачуз фида,
Чара ая бес кьадар.

--Квез я чи а ажайиб шей,
Вучда чна адакай?
--Интернет я кьилин метлеб,
Амач захъ ахвар-кьарай.

--Гьич гъавурда акьазвач зун,
Жедачни дуьз лагьайт1а,
ЖК кьулу телевизор,
Телефон чахъ авайд я.

--Акъатнава ц1ийи са зат1,
Аламатрин аламат,
Герек къведай вич гъвеч1идаз
Ч1ехидазни гьакъикъат!

Са легьзеда жагъурда дуст
Такур шумуд йисарин,
Гьейранарда рецептари
Сагъламвилин, тортарин.                                            

Жавабар четин суалриз,
Ктабарни гьар жуьре,
Чириз дуьньядин хабарар
Хкяна к1анда уьлкве.

Аяларни патараллай
Компьютердай аквада,
Чун абурухъ экрандилай
Патавай хьиз рахада.

Гьатта свасни жагъур жеда
Интернетдин клубдай,
Парталарин хкягъ фасон-
Рахкурда ви к1алубдай.

Мислятар гуз президентдиз,
Кагъазар, пул ракъагъиз
«Лезги кимел», «Шарвилидиз»
Физни йифен кьулариз.

Интернетдихъ мумкинвилер
Мадни гзаф авайд я
Галачиз ам амай уьмуьр
Ракъур жадан гьавайда?

Рази жеда вуни, къари,
Ахъагъайла Лезгинет,
Сиягьатиз чилин шардал
Лазим къвезмач чаз билет.

                                  июль 2011 йис

Зи Дагъустан

Ухшар я вун, заз, Дагъустан,
Зурба тарциз дувул дерин,
Экъеч1навай дагълар юкьва, 
Патав вили Каспи гьуьлуьн. 

Эч1язавай эк1уь гару
Жанлу хилер тандин яц1у,
Такабурлуз фурсзава на,
Дагъларикай кьуна далда.

Гьисаб тежер кьадар бертер
Жезва, тар, ви шумуд хилел,
Эгер ят1а хел са миллет,
Дагъвияр я ви гьар са берт.

Тик хилерин я вун бине,
Кьеж кутазвай диде-чешме,
Бегьер гъизвай, дамахар гвай,
Гатфар бере свас хьиз ч1агай.

Шумудни сад жезвай гьейран,
Гьужумиз вал къвезвай душман,
Хаз ви хилер, ягъиз ваз ц1ай,
Акъудиз алахънай пунай.

Хьанач, жедайди туш гьунар,
Муьт1уьгъардай гьайбатлу тар,
Мягькем дувул хуьзва чили,
Хайи бертер жезва ц1ийи.

Яр - емишдиз гуьрчег, фараш,
Тарцин пешер, ингье тамаш,
Къугъваз цава, лепейралаз
Чк1урзавай манид аваз.

Ихьтинбур я адан ц1арар:
Азадвал я рик1ин дидар,
Ислягьвал хуьн я чи гьунар,
Яшамишрай садвал, дустар!

Гьар дагъвидин еке зегьмет,
Ватан патал къведа герек,
Стха миллетрин тир макан,
Яшамишрай, зи Дагъустан!
                           2010 йис

31 декабрь

Катзава йис, яна лишан
Уьмуьрдин тараз,
Элкъвезва къе гъилевайди
Алатай йисаз.

Тазва хьайи агалкьунар,
Гьайифар, дертер,
Ц1ийи йиса ц1ийийида
Гьар садан гьиссер.

Сабур гуда рик1еризни
Умудрай ац1ай,
Акьул атуй кьилеризни
Фикирар кьац1ай.

Рекье таз йис къаршидизни
Гьазур я гафар,
Цуькведин т1ур илиг жезвай 
Хурава гатфар.

Югъур хьуй ваз Акъатзай Йис,
Хутах ви парар,
Агатзава чав Аждагьан-
Илан, квай лувар!

Ц1ай чк1изва адан сивяй,
Къул хуьда чимиз,
Ак1ай бере къведа цавай,
Куьмекдиз тадиз!

Ст1ал Сулейманан шиирриз

Эй, Сулейман, мицел зирек,
Халкьдин шаир, халкьдиз герек
Къвезма къени ви шиирар,
Ви камаллу гуьзел чIалар!

Яратмишай жавагьирар
Гьамгад яд хьиз михьибур я.
Ви гьар са цIар, гьар келима,
Сад- садалай хцибур я.

ЧIехи хьайи кесибвиле,
Еке къастар аваз рикIе,
Ачухардай элдин гуьгьуьл,
КIелиз вуна шиир «Билбил».

Гьар садакай туькIуьриз чIал,
Алчахар русвагьиз кимел,
Аял,чIехид, хзан патал,
Несигьат я шиир «Темпел».

КIандачир ваз фитнени таб,
Гьахъвал, дуьзвал тир ви ният
Чешне я чаз, гафар устад,
«Валлагь итимвал хъсан я».

ЧидачиртIан  кхьин-кIелун,
Дерин я ви фагьум,кьатIун,
Савадлувал- кьилин метлеб
Я шиирдин тIвар тир «Мектеб».

Вири уьмуьр  мичIивиле,
Авачиз сес, авамвиле
Амукьтавур къе дишегьли,
ВикIегьдаказ кIел «Назани».

Дагъустандин халкьдин шаир,    
Дуствилин ваз чидай къадир.
Сад авунай миллетри сир,
Ван атайла «Юлдаш» шиир.

Шиирар вахъ ава пара,
Гьардахъ ава зурба мана,  
КIел тавуна гьикI акъвазда,
«Вун квахь кьей куьгьне замана?  
  
Туьхуьндач ви шииррин нур
Вири дуьньядиз хьай машгьур,  
Чи несилрин руьгьдин абур- 
«Дагъустан», «Къафкъаз», «Судуяр»…  

ХХ-асирдин Гомеран  тIвар
Къазанмишна на СУЛЕЙМАН!
Баркалла ваз цавун аршдиз,    
Хкажайдай чи Лезгистан!  
 
Декабрь  2011г.

Ц1арарин къуват

Лугьузва къе, къимет амач шаирдиз,
Шиирарни ни к1елзама?- лугьузва,
Анжах кьарай, мажал тагуз факъирдиз,
Аруш жезва ц1арарин ц1иргъ, тухузва.

И патахъни, а патахъни, яргъариз,
Гьар мензилрин рекьер-хвалар ат1узва,
Хъуьт1уьн цик1из бахшай къвезмай гатфариз
Шикилдай мад зулун сифет кьат1узва.

Рап-рапзавай гъетери хьиз цаварин,
Садбуру чим гуда, садбур къайи я,.
Са бязибур къагьриманрин турарин 
Халис алмас мурцарлайни хци я.

Чандик ифин, къалабулух кутазвай
Эк1я жезва ц1арар чарчел дафтардин,
Ц1ун ц1елхемар, к1утадкай чад гатазвай 
Хкатзава, на лугьуди, уст1ардин.

Чи вахтариз Марин, Саид хкизва- 
Ван ийиз таз алакьайбур гафарив!
Илгьамдин звал акъалтзавай дилизва,
Гьарайдиз гьай вахкуз тадай рагарив!

Ктабдин чар артух хьанва  тарихдин,
Къанни са виш йисаризни акъатна,
Ават1ани санбар крар тарифдин,
Гьа са азар кьиле физвач хкатна.

Гагь туьхуьнда, гагьни фад-фад чк1изва
Къаршиламиш ийидайла тамамдиз,
Къужахдиз физ, хушуналди кит1изва,
Пич1и нефсер, икрамзавай гьарамдиз.

Акваз буьркьуь, ван къвез биши ийизва,
Рахайт1ан мез, файда авач рахункай,
Зегьерлу к1венк1 к1вадриз агъу диризва,
Вегьез хилер, тергиз ц1ирер чил кьунвай.

Жанлу тарар алугариз элкъвезва,-
«Хьайиди хьуй, зи девирда бес жеда»,
Пакад йикъан умуд ат1уз къвекъвезва,-
«Авачирдахъ, лагь вучиз зун шез жеда?»

Аксибуру желб ийизва къуватар- 
Дериндиз сух жезват1ан к1венк1 жендекдиз,
Эхийизвай  ц1угъадаллаз азабар,
Дурум гузва, аквазват1ан гьелекдиз.    

Лугьузва къе, къимет амач шаирдиз,
Шиирарни ни к1елзама?- лугьузва,
Анжах кьарай, мажал тагуз факъирдиз,
Аруш жезва ц1арарин ц1иргъ, тухузва…                  Май 2011 г

ВУЧИЗ

Шаир хьунухь акьван зурба са кар туш,
Еке т1варц1из лайихлубур авазва,
Къвез-алатиз шумуд девир, инкар туш,
И дуьньяда вири тирвал амазма.

Вучиз, вучиз таб я къенин гьар са югъ,
Тарифариз кьилер хуьзва вирида?
Ханар гайи акъудиз вилер буйругъ,
Дегиш хьанвач, кьазма жаллат1 кирида.

"Сир хуьда за, муьзд къачузвайд лагь вуж я?"-
Намус маса гузва кьиле авайда.
-Етим Эмин, ви вахтарин гьа гуж я,
Кесибринбур гьа вай-зир я гьавайда.

-Куьре-Мелик,гьик1 жезва заз яшамиш
Хьайид я вахъ галаз къадим йисара,
Лугьун за ваз, акьван я хьи утанмиш,
Тирвиляй чун гьа сифте хьиз бейчара.
                                
                               22.11.2011г

Заз лагьайт1а

Ц1ийивилер гзаф я и аямдин
Вилик физва технический прогрессни,
Аламатдин агалкьунри инсандин
Акъудзамач гьекьед ст1ал пелез чи.

Заз, авайвал лагьайт1а, лап ширин я
Эк1уь тир дад зи зегьметдин гьекьедин
Цан цайидаз гекъигизни четин я
Къуьлуьн са твар няметарив дуьнедин.

Заз, авайвал лагьайт1а, лап ширин я
Эк1уь тир дад зи зегьметдин гьекьедин
Чагъад гьарай гекъигизни четин я
Азиятрик япаравай дидедин.

Заз, авайвал лагьайт1а, мад ширин я
Эк1уь тир дад зи зегьметдин гьекьедин
Атирлу ни гекъигизни четин я
Чигедамаз маргъв гваз физвай бередин.

Заз, авайвал мадни лугьун, ширин я
Эк1уь тир дад зи зегьметдин гьекьедин
Гьамга къайи яд гекъигиз четин я
Са вахтара гичиндавай чепедин…

Жафа ч1угун тавунайт1а, якъин я
Амукьдай чун маймунар яз жуьредин,
Кич1езва заз, гекъигизни четин я
Тийижирдаз т1ям зегьметдин гьекьедин.

Чандиз регьят, рик1ин т1алар артух я,
Т1ебиатди гузва жаза, инсафзач,
Зегьметдин гьекь сагъламвилин сандух я,
Къайид татуй, ам атайди къакъатзач.              
                                               Июнь 2011йис   

Зи баде

Бадеяр захъ авазва кьвед, 
Кьведни сад хьиз багьа я,                                  
Сад лезги я садни гуржи,                             
Гуржид хва зи буба я.
Хабар кьазва за бадедвай:                                 
--Гьи ватан, лагь, ваз к1ан я?                             
--Гьик1 к1ан ят1а ваз бадеяр,                       
Гьак1 кьведни заз масан я.
--Баде, яргъал Гуржистандай?                       
Ст1алдал гьик1 атанай?                                       
-- Са ротада къуллугъзавай                                  
Дуст стхади хканай.                    
Кутадайт1ан кич1 гъвеч1измаз,  
«Чуьнуьхда гьа вун лекди!»--            
Рази хьанай диде гуз руш,                                
Лезги тирла зирекди.                              
Дявед гуьгъуьн (йи)сара, хтул,           
Зегьмет ч1угваз виждандал,              
Миллетари сад яз Союз,                                   
Чан хкайд я ватандал.
Интернационал хзан                      
Агъзурралди кутурбур!                         
Мич1и пип1ер чи уьлкведин 
Ишигълаван авурбур:
Тоня, Дуся, Надя, Света                              
Лида,Мария - латыш,                                        
Арменидай Валя, гьайиф,                   
Гзафбур къе хьанва кечмиш!                      
Дуьньядин чарх элкъуьрнава,                 
Какадарна пис-хъсан,                          
Сергьятари ахъайзамач                               
Хайи к1вализ физ жуван.
-Яшамиш жез Лезгистанда,                    
Гьихьтин уьмуьр тухвана,                                    
-Рази яни вун кьисметдал?                                   
-Бадедвай за жузана:
--Ц1ек1уьд (йи)савай жегьил жаван 
Хвани аваз къужахда,                              
Хтайла чун лезги хуьруьз                                   
Кас авачир утагъда.
Кутуна к1вал, чир хьана ч1ал, 
Духтурвилин пеше квай,                         
Чидачир гаф «авач мажал»                     
Ат1удай вахт йифекай.
Ви бубадин таярилай,                             
Кьабулайд я аялар,                            
Гьисабайт1а шумуд вишехъ    
Агакьдат1а кьадарар.
Берекатлу жегьил йисар,                               
Катна фена, яшлу я,                                        
Къе пай хьайла ч1укар-ч1укар 
Гьукуматар дертлу я.
Кьисметдилай рази я зун-                
Къачуз жеда гайивал,                                 
Девлет авач, къазанмишна                      
Гьуьрмет завай жеривал.
Авдина т1вар эцигнай зал                        
Плендай вич хтайла,                                           
Зи бубади къутармишай                          
Немка рик1е амайла.
Инсанвилин квахьдач къимет,      
Амукьда пак михьи т1вар,              
Гуржи тир зун хьанва лезги,              
Хуш я, хтул, заз и кар.
Сефилзава къе зи баде,                                    
Рахазват1ан багърийрихъ,    
Интернетдай к1валин къеняй             
Вичин хайи гуржийрихъ.
Т1алабзава за бубадвай-               
Мугьман жед мус Т1ифлисдиз?              
--Эхи жезвач акваз баде                   
Хажалат кваз, гьайифдиз.    21.11.2011йис

Ша

 «Квадрай, гъиляй вегьей несил»-                   
Лугьузвай къе балайриз,
-«Шел-хвал ийиз,квел хьана вил?», -
Суал я квез бубайриз.

Аяларин авур вердиш
Килига квез туьгьметриз,
Куь гъалат1риз тежер багъиш
Эцигзавай къиметриз:

Шехьмир, лугьуз авач хатур,
Диде-буба саймиш туш-
Кьуьзуьбурун хьанвай какур 
Хатур хуьнихъ таниш туш!

Алаш-булаш девирд ч1авуз,
Тербидиз амукьнач вахт,
Садбуру фан жагъурна к1ус,
Муькуьбру - девлетни тахт.

Тарашунар, чуьнуьхунар,…
Гьасил тийиз вахчуз дул,
Вучиз ганай эхтиярар
Чк1уриз чи мягькем къул?

Къалурначт1ан чаз кашни-мекь
Алвер ийиз шейэрал,
Чирнач къадир зегьметдин, гьекь
Акъатнач чи пелерал.

Аттестатни диплом яру
ВУЗ-дин такур вилериз
Вахкуз санал, тежез шаклу
Т1ал акъуднач кьилериз.

Кар алакьдай акьуллуяр
К1валахрихъ куз-хъукъвазва,
Ябуяр тир «халуд хваяр»
Къуллугъарал аквазва.

                                                                                                           Бейкарарин куьчейраваз,                                                                                                            
Югъни- йифни какахьна,
Вахт рекьизвай хъвазни ч1угваз
Мефт1ер михьиз ацахьна.

Ачух хьана и арада
Рекьер «тамун стхайриз»,
Гьахъни-нагьахъ «гьакъикъатда»
Тестикьардай «архайриз».

Агъзурралди жегьил жаван
Желбзвайбуру кьушунриз,
Чеб кьулухъ жез шумуд хзан
Ясда тунва алцурриз.

Ватан патал чи таяри
Душманриз ц1ай гайид я,
Лагь,къугъвадай автоматри
К1валер нибур кайид я?

Фялевилиз, лежбервилиз 
Фидай амач зегьметкеш,
Т1ебии шей жегъин тийиз,
Азарар я чаз пишкеш.

Девлетлу, къуватлу макан
Кесибвилиз вегьезва,
Махлукьатдин авурла сан
Россиядал хъуьрезва…

Вахтунинбур я суалар,
Гьахълубур я арзаяр-
Агакьнава куь балаяр,
Хьанва чакай бубаяр.

Несил гъиляй вегьей тегьер,
Амукьайт1а бала я,
Ихьтин техил бегьер-зегьер
Тумуниз тун хата я.

«Вуч цайит1а, экъеч1да гьам»,-
Мисал ава атайрин,
Гъалат1рикай менфят тамам
Хкудин чи бубайрин.

Ватанперес миллионар,
Ша, экъеч1ин  женгиниз,
Ватан к1ани, ша юлдашар, 
Хкин уьлкве гуьнгуьниз! 

Март 2011 йис.

Ша, къарагъ

Эхь, хьайид я чахъ гьунарар!...
Гьихьтин чидай мублагь вахтар!...
Аквадат1а мад а  бахтар!...
Гьайиф, лацу жезва ч1арар!...

Ша, ахварай ават халкьар,
Бесрай ч1угур гьайифд гъамар,
Къакъаж гъилер,ийин крар,
Пад-пад жезва куьгьне сурар!

Атайрилай атайралди
Женг ч1угурд я яргъаралди,
Къачурди туш са югъ муьгьлет,
Декьикьадиз авай къимет.

Гьазурандал аватайбур,
Асайишдик акатайбур,
Гуж тагана ахкьалтайбур,
К1вач галк1ана тан гьалчхьайбур!

Зегьметкешри авур вердиш,
Тухудани ик1 яшайиш?
Хьана к1анда чаз утанмиш,
Къазанмишиз анжах къаргъиш!

Вегьедалди къат руг винел,
Къарагъ, гьикьван къаткин чилел!
Геж тахьуй кьил хкиз кьилел,
Амукьдач чун садан рик1ел!

4 август 2011 йис 

Регъуь я заз

Гьик1 жезва заз бязи бейкар инсанар,
Яваш-яваш гьайванариз элкъвенва,
Квадарнавай тафаватлу лишанар,
Вагьшияр яз мад тамариз хъфенва.

Пич1и кьилер, мефт1 бейгьушдив ац1урай,
Магъарайра к1ват1алзава азгъунри,
Мажбур ийиз кьиле тухуз буйругъар,
Чанариз къаст ийиз тазва къанлуйри.

Келлегуьзри хушреканрин чилерай
Дадмишзавай зегьер кутур вирт1едик,
Телефзава бейхабардиз гьиссерай 
Ац1ай рик1ер, вил галамай дуьнедихъ.

Яшамиш жез къанни са виш йисара,
Регъуь я заз шагьид жез и вахтарин,
Какахьнавай дуьзни патахъ шарт1ара
Лук1ар хьанва ксар кьац1ай пуларин.

Ракъинин нур гележегдин несилрин 
Алахънавай мич1ивилив басмишриз
Есирвилиз хушуналди эмиррин
Физвайбуруз жедач завай багъишиз.
 
Регъуь я заз, хьайид я мад дявеяр,
Халис эркек женгера жед  вилерик,
Къе «итимар» хъиткьинариз бендеяр,
К1еви жезва дишегьлийрин ценерик.

Гьалдариз сад садал, чун чаз так1анриз-
Фагьум ая, четин туш кьил акъудун-
Миллиардар гьайиф къвезвач  душманриз
Эрзиман тир ватан чавай къакъудун.

Башчиярни гъилибанар, иблисар,
Ухшар куцар къекъвезвай чи арайра,
Ише- кьиле тефидай гвай силисар,
Чир хьухь, куда куьн кьисасдин ц1аяра!
                                   2011-03-09

Зи хциз

Квехъ гекъигда вун куьрпе яз 
Къужахай легьзе,
Вири девлет,чанни жуван
Гьазур я зун ийиз къурбанд,
Чан хва, ви рекье.

Гьейранардай гъвеч1и ч1авуз
Гьар амалди ви
Сифте камар, сифте гафни
Экъеч1ай вахт сифте сахни
Рик1елама зи.

Акваз – такваз фена йисар,
Вун хьанва ч1ехи,
Квахьнава зи ахвар, кьарай, 
Къурху кутаз рекьер санбар 
Ачух я ц1ийи.

Гьинихъ фида? Гайи тарсар
Кьунат1а вуна?
Никай жедат1, яраб, дустар,
Гьихьтин тада рик1е къастар,
Фикирзава за.

Сад я вири дидейрин гаф
Вафалуди хьухь!
Залумармир заз мич1и йиф,
Жегьил чанни ша гьак1 гьайиф,
Акъудмир зай ухьт.

Фагьум-фикир ая вуна,
Тамир хиве къан,
Хъвамир, к1ан жемир гьич ички
Ч1угвамир, жув мийир дили,
Уьмуьр я масан.

Вахъни хьурай ви аялар
Чир жеда ваз дад.
Балаяр я ширин зат1ар,
Яхъ дидед рик1икай хабар,
Дуьз рекьяй алад!

30 май 2010 г.

Бадедин квар

Аманат яз хуьзва за
          Багьа ядигар,
          Нек1един чар юзурдай
          Кьенч1ин яру квар.

         Сун хранвай ц1ару еб,
         Сив кут1ундай хъурхъ,
         Галай кварци хутахда
         Вахтар заз кьулухъ…

         Къе зани а кварцелай
         Вахчузва дуьдгъвер,
         Багъишзавай гьакъисагъ
         Зегьметди бегьер.

         Юзурдайла ацукьна,
         К1ват1 жеда кифлет,
         Кварцик чпин пай кутун
         Хьанвайбур хесет.

         Гьатда к1вале манидин
         Рик1из хуш аваз,
         Квар вегьейла мет1ел кьаз
         Бадед чирай заз:

         «Нехирар хьуй калеркай,
         Хиперкай суьруь,
         Зи гафари темпелдиз,
         Авурай регъуь.

         Хкяйнек1ед къафунар,
         Мукашни ниси,
         Бул хьуй къаймах гет1ейра
         Нек1един фири.

         Ац1анват1ан суьрсетрив
         Базарар пара,
         Гьикьван, гьикьван дадлуда
         Давугъад хап1а!

         Элец1тавуй биц1екар,
         Квар, куьмекдиз ша!
         Гузанариз лавашар
         Чразва хьра.

         Кьегьалар яз ч1ехи хьухь
         Алакьдай крар,
         Тада за квез савкьват яз
         Зи бадедин квар».

         Анжах са кар аян я,
         Заз хуьзвай и квар
         Амукьдат1а юзурдай
         Ч1ем ник1един чар?…    2010йис    

Муьт1уьгъ я чун т1ебиатдин къуватдиз,
       Къугъурзавай вичиз к1ани жуьреда,
       Яр-емишарни аламаз са йифиз
       Таз алакьай чуьллер,багълар шуьшеда.

       Чир хъхьанач, расалмиш хьай дуьшуьшдал,
       Накьан шикил, агажарна векь къаю,
       Ажугълу гар ат1уз хци уьлгуьчдал,
       Гваз къекъвезва къайи цава пеш къацу.

       Мурк1уц1арни куьрсар хьанва къаваркай,
       Вахтсуз мугьман, элифнавай хабарсуз,
       Къайгъувачир бейхабаррин гьаларкай, 
       Яраб яргъалд акъваздат1а зурар гуз?
                              
       Алагуьзлуь гуьрчег къамат дегишна,
       Вил амай чи къарникъузра, инжийра
       Вучиз, вуна, кьуьд, фад  къаяр игисна,
       Амаз халкьар гьеле зулун дердийра?

Къекъвезва зун аламатдин жигъирдай,
Жугъун кьунвай жик1ийрини къукъвайри,
Цацари кьаз ахъайзавач есирдай:
--Акъваз, килиг, гьик1 лув гузват1 дурнайри.

Хъуьрезвай рагъ галукьна нагъв къиткьинай,
Вилери зи  мирги гъалар кьат1узва,
Женжел гару, ялиз, кьат1из киткинрай, 
Къугъваз, абур чилел, гьарнихъ тухузва.

Ингье, ала, п1ип1инар хьиз таварин,
Серк1верал кьил хкажнавай валаркай,
Пешерални, ярк1и патан рангарин,
Гибе храз, авахьзавай тараркай.

Геляна цен цагъамдихъай физвай зун
Мад къах жезва, ван хьайила ширширдин,
--Хъван са капаш, хьанвачт1ани зун юргъун,
Ацукьда, яб гуз манидихъ ч1имч1ирдин.

Алгъанмазди, серсер хьана амукьна,
Къарникъузрин тажар жерге акурла,
Элкъвена кьил, ни атирлу  галукьна,
Къиб ягъай векь инихъ-анихъ авурла.

-Гуьт1уь жигъир, куьгьне таниш, хевлетдиз
Алхишзава за ви гежен цуькверал,
Икрамзава багъишзавай девлетдиз,
Ашукь хьанвай галгам кьунвай хилерал.

Мере, ч1ухлумп1, мертер, жик1и, къукъваяр,
Инияр- гьар сад дарман я, дава я.
Т1ебиатди сих авунвай араяр,
Зи жигъир, заз зулухъай вун ала я.

Ават1ани рекьер шегьре патарив,
Вахъ суьгьуьрдин къуват ава галч1урдай,
Сейриз тадай рахаз къалин валарив,
Берт юзуриз, рази жезвай хатурдай. 

Октябрь 2011 йис

ИСТОЧНИК: http://www.stihi.ru/avtor/ynga909

загрузка...

  • 1
  • 2
  • 3
  • 4
  • 5
Чтобы скачать композицию, щелкните правой клавишей мыши по ссылке "Скачать" и выберите "Сохранить объект как". Если песня открылась в новом окне в виде плеера, сохранить ее можно выбрав в браузере "Файл" - "Сохранить как". Категория: Лезгинская Литература | Добавил: Admin | Теги: Просмотров: 10718 | Загрузок: 0 | Рейтинг: 4.4/5
Источник: http://ispik.ru/load/lezgi_lezgiler_lezgins/lezginskaja_literatura/dzharijat_magomedova_stikhotvorenija_na_lezginskom_jazyke/43-1-0-729



Рекомендуем посмотреть ещё:


Закрыть ... [X]

Стихи на лезгинском языке, Е. Эмин Лезгин.ру - лезгины, лезгияр, песни Конкурс чтецов и. а. крылов

Стих о любви на лезгинском языке Стих о любви на лезгинском языке Стих о любви на лезгинском языке Стих о любви на лезгинском языке Стих о любви на лезгинском языке Стих о любви на лезгинском языке Стих о любви на лезгинском языке